നൃത്തം മനോഹരമായ കലയാണ്. എന്നാല്‍ സമയവും സന്ദര്‍ഭവും നോക്കാതെ നൃത്തം ചെയ്താല്‍ എന്താ പറയുക. കൊളംബിയയിലെ ബൊളിവറിലുള്ള സാന്താക്രൂസ് ഡി ബൊകാഗ്രാന്‍ഡെ ആശുപത്രിയിലാണ് ഇത്തരമൊരു അനവസര നൃത്തം അരങ്ങേറിയത്. ഓപ്പറേഷന്‍ തീയറ്ററിലെ ടേബിളില്‍ രോഗിയെ പൂര്‍ണനഗ്നയാക്കി കിടത്തിയതിനു ശേഷമായിരുന്നു ഡോക്ടര്‍മാരുടെയും നഴ്‌സുമാരുടെയും സംഘനൃത്തം. നൃത്തത്തില്‍ പങ്കെടുക്കാത്ത ചിലരാണ് രംഗങ്ങള്‍ പകര്‍ത്തിയത്. എന്നാല്‍ ഈ വിഡിയോകള്‍ സോഷ്യല്‍ മീഡിയയിലൂടെ വൈറലായതോടെ നര്‍ത്തകര്‍ക്കെല്ലാം പണികിട്ടി. അഞ്ചു പേര്‍ക്കാണ് സസ്‌പെന്‍ഷന്‍ ഓര്‍ഡര്‍ അടിച്ച് കൈയ്യില്‍ കിട്ടിയത്.
പൂര്‍ണനഗ്നയായ രോഗി അബോധാവസ്ഥയില്‍ ഓപ്പറേഷന്‍ കാത്തുകിടക്കുമ്പോഴായിരുന്നു ഇവരുടെ കുട്ടിക്കളി. ഇതില്‍ നഴ്‌സുമാരും ഡോക്ടര്‍മാരും ചിരിച്ച് കൊണ്ട് എല്ലാം മറന്ന് രോഗിക്ക് ചുറ്റും നൃത്തം ചെയ്യുന്നത് കാണാം. എങ്ങനെയോ ഓണ്‍ലൈനനില്‍ ചോര്‍ന്ന ഈ വീഡിയോ പെട്ടെന്ന് വൈറലാവുകയായിരുന്നു. വീഡിയോയില്‍ കണ്ട അഞ്ച് ജീവനക്കാരെയും സസ്‌പെന്‍ഡ് ചെയ്തുവെന്ന് ആശുപത്രി അധികൃതര്‍ സ്ഥിരീകരിച്ചിട്ടുണ്ട്. ഹെല്‍ത്ത് പ്രോട്ടോക്കോളുകളും ലംഘിക്കുന്ന വീഡിയോ ആണിതെന്നും അധികൃതര്‍ പറയുന്നു. തങ്ങളുടെ ക്ലിനിക്കിലെത്തുന്ന ഓരോ രോഗിക്കും ബഹുമാനം നല്‍കുകയെന്നത് തങ്ങളുടെ ക്ലിനിക്കിനെ സംബന്ധിച്ചിടത്തോളം ഏറ്റവും പ്രധാനപ്പെട്ട കാര്യമാണെന്നും അതിനാല്‍ ജീവനക്കാര്‍ നടത്തിയ അനുചിതമായ പ്രവൃത്തിയില്‍ ഖേദിക്കുന്നുവെന്നും ആശുപത്രി ഉടമകള്‍ പറഞ്ഞു. ഈ വീഡിയോ തങ്ങളുടെ സര്‍ജറി റൂമുകളിലൊന്നില്‍ വച്ചാണ് പകര്‍ത്തപ്പെട്ടിരിക്കുന്നതെന്നും ഇവര്‍ സമ്മതി്ച്ചിട്ടുണ്ട്.ഇത്തരത്തിലുള്ള പ്രവൃത്തികള്‍ ആവര്‍ത്തിക്കാതിരിക്കാനുള്ള ചില നടപടികള്‍ സ്വീകരിച്ച് വരുന്നുണ്ടെന്നും അവര്‍ വ്യക്തമാക്കുന്നു.എന്തായാലും ഈ നൃത്തം മറ്റുള്ളവര്‍ അനുകരിക്കാതിരുന്നാല്‍ മതിയായിരുന്നു.
